Navigation auf uzh.ch
Navigation auf uzh.ch
Il project „Diever ed acquisaziun dil lungatg tuatschin“ ha la finamira da documentar e perscrutar il tuatschin, ina varietad romontscha che ei tochen ussa aunc buc vegnida perscutada. Enteifer quei project vegn ei creau in corpus (ina rimnada da datas linguisticas) audiovisual dil lungatg natiral, che vegn silsuenter transcrets e glossaus. Cun agid da quei corpus san ils perscrutaders dar risposta ad damondas linguisticas interessantas. Quei corpus ei medemamein l’emprema gronda rimnada da datas audiovisualas dil romontsch plidau dil mintgadi.
Il corpus cuntegn duas parts: l’emprema part consista da lungatg da carschi (da differentas vegliadetgnas) e la secunda part cuntegn enregistraziuns da sis affons e lur acquistaziun dil tuatschin. Quels affons han ina vegliadetgna da dus tochen treis onns e vegnan filmai ina gada ell’jamna duront in tochen dus onns.
Ils corpus vegnan glossai, quei vul dir enrihi cun inforaziuns grammaticalas sin differents nivels linguistics. Denter auter vegnan aspects dalla congruenza grammaticala e dil contact linguistic perscrutai. Il context plurilinguistic dils plidaders tuatschins, cunzun era l’influenza dil tudestg, ein fetg interessants puncts da partenza dallas retschercas.
Plinavon ei il tuatschin era ina varietad romontscha periclitada, cunquei ch’ei exista buc in lungatg scret. Il corpus audiovisual duei perquei documentar ed enrihir il tuatschin ed aschia procurar per ina promoziun dil lungatg.
La documentaziun dil tuatschin vegn procurada cun in corpus (ina rimnada da datas linguisticas. El ei igl emprem corpus grond dil romontsch da mintgadi plidau. Il corpus consista ord datas linguisticas d’affons e da carschi.
Dr. Philippe Maurer creescha ina grammatica davart il tuatschin ed il medelin, che vegn publicada tier Language Science Press en la retscha „Studies in Diversity Linguistics“.
Dr. Claudia Cathomas e Dr. Géraldine Walther construeschan cun agid da persunas interessadas dalla Val Tujetsch ed en collaboarziun cun Dr. Benoît Sagot (Inria, Paris) igl emprem lexicon ed empremas normas d’ortografia pil tuatschin.
Dr. Géraldine Walther e Dr. Benoît Sagot (Inria, Paris) sviluppeschan in sistem d’annotaziun morfosintactica (MELT roh-t Tagger) pil tuatschin.
Era publicaziuns scientificas davart ils puncts d’interess dil project congruenza e contact linguistic ein planisadas (mira publicaziuns).
Il project davart il tuatschin vegn finanziaus dil Fond Naziunal Svizzer.
Il project parzial davart il contact linguistic vegn sustenius digl institut per la perscrutaziun da la cultura grischuna (ikg) e dil Universitärer Forschungsschwerpunkt Sprache und Raum dall’universitad Turitg.
